စိတ်ဖိစီးမှုများပြီး စိုးရိမ်ပူပန်မှု လွန်ကဲနေချိန် ပြုလုပ်သင့်တဲ့ လေ့ကျင့်ခန်းများ

စိတ်ဖိစီးမှုများပြီး စိုးရိမ်ပူပန်မှု လွန်ကဲနေချိန်မှာ ပုံမှန်လုပ်ဆောင်နေတဲ့ ခန္ဓာကိုယ်ရဲ့ ပုံမှန်လုပ်ဆောင်မှုတွေထဲက တစ်ခုဖြစ်တဲ့ အသက်ရှူဖို့ မေ့နေတာတွေမျိုးတောင် ဖြစ်တတ်ပါတယ်။

စိုးရိမ်ပူပန်မှု လွန်ကဲနေချိန်မှာ ကောတီဆော ဟော်မုန်း (Cortisol Hormone) ကဲသို့သော စိတ်ဖိစီးမှု ဟော်မုန်း (Stress Hormones) များ ခန္ဓာကိုယ်မှ ထွက်လာပါတယ်။

ဒီဟော်မုန်းများသည် သွေးတွင်းသကြားဓာတ်ပမာဏနှင့် သွေးအဆီ လို့ခေါ်တဲ့ Triglycerides (blood fats) ရဲ့ပမာဏကို တိုးလာစေပါတယ်။

ဒီဟော်မုန်းများက ခန္ဓကိုယ်ကို အောက်ပါသက်ရောက်မှုများ ဖြစ်စေပါတယ်။

မျိုချရခက်ခြင်း၊ ခေါင်းမူး ခေါင်းကိုက်ခြင်း၊ ပါးစပ်ကို ခြောက်သွေ့စေခြင်း၊ နှလုံးခုန်မြန်ခြင်း၊ ပင်ပန်းနွမ်းနယ်ခြင်း၊ အာရုံမစိုက်နိုင်ခြင်း၊ ယားယံခြင်း၊

ကြွက်သားတင်မာ ကိုက်ခဲခြင်း၊ ပျို့အန်ခြင်း၊ အသက်ရှူမြန်ခြင်း၊ အသက်ရှူကြပ်ခြင်း၊ ချွေစေးများထွက်၍ ကတုန်ကယင် ဖြစ်ခြင်း၊ ကိုယ်ခံအားစနစ်ကို ကျဆင်းစေခြင်း၊

အစာခြေစနစ် မမှန်စေခြင်း၊ ကြွက်သားများ တင်မာမှုဖြစ်ခြင်း၊ ရေတိုမှတ်ဉာဏ် ဆုံးရှုံးစေခြင်း၊ အရွယ်မတိုင်ခင် သွေးကြောကျဉ်းရောဂါဖြစ်စေခြင်း၊ ရုတ်တရက် နှလုံးဖောက်ပြန်မှု ဖြစ်ခြင်း အစရှိသည်တို့ ဖြစ်တတ်ပါတယ်။

စိုးရိမ်ပူပန်မှု လွန်ကဲတဲ့သူတိုင်း ဒီလက္ခဏာတွေအားလုံး ချက်ချင်းဖြစ်နိုင်တယ် မမှတ်ယူစေချင်ပါဘူး။

ဒါပေမယ့် စိုရိမ်ပူပန်မှု လွန်ကဲတဲ့သူတိုင်း ဒီလက္ခဏာတွေအားလုံးထဲက တစ်ခု သို့မဟုတ် တစ်ခုထက်ပို၍ ဖြစ်နိုင်ပါတယ်။

ဒါကြောင့် မိမိဟာ စိုးရိမ်ပူပန်မှု လွန်ကဲတဲ့သူတစ်ယောက်ဆိုရင် မပေါ့ဆသင့်ပါဘူး။ ထို့ကြောင့် စိုးရိမ်ပူပန်မှု လွန်ကဲနေချိန်မှာ သက်သာစေမယ့် လေ့ကျင့်ခန်းလေးတွေကို အောက်မှာ ဖော်ပြပေးလိုက်ပါတယ်။

(၁) အသက်ရှူ လေ့ကျင့်ခန်း

စိုရိမ်ပူပန်မှုတွေ လျှော့ချသွားပြီး စိတ်လက်ပေါ့ပါးသွားစေဖို့ အသက်ရှူလေ့ကျင့်ခန်းကို လုပ်သင့်ပါတယ်။ အသက်တဝကြီး ရှူလိုက်တဲ့အတွက် သွေးတွင်းအောက်စီဂျင် ပမာဏကို တိုးလာစေပြီး ပူပန်မှုတွေ လျော့ကျသွားပါလိမ့်မယ်။

အသက်ရှူလေ့ကျင်းခန်ကို ပေါ့ပေါ့တန်တန် သဘောမထားသင့်ပါဘူး။ လောကီဘက်မှာ အသုံးချမယ်ဆိုရင် ကျန်မာရေးနှင့်တကွ အခြားအကျိုးကျေးဇူးများစွာ ရနိုင်သလို လောကုတ္တရာဘက်မှာဆိုရင်လည်း နိဗ္ဗာန်အထိ ပို့ဆောင်ပေးနိုင်တဲ့ နည်းလမ်း ဖြစ်ပါတယ်။

ဒီလောက် အကျိုးများတဲ့ အသက်ရှူလေ့ကျင့်ခန်းကို အလွယ်ဆုံးနည်းနဲ့ ဖော်ပြပေးလိုက်ပါတယ်။

လေ့ကျင့်ခန်းစလုပ်ဖို့ အသက်ကို ဖြည်းညင်းစွာ ရှူသွင်းပါ။ စရှူသွင်းတာနဲ့ ၁၂၃၄၅ လို့စိတ်ထဲကနေ ရေရွတ်ပါ။ အဆုတ်ထဲ လေပြည့်သွားတဲ့အချိန်နဲ့ ၅အထိ ရေရွှတ်ပြီးတဲ့အချိန် တပြိုင်တည်းဖြစ်ရပါမယ်။

ပြီးရင် ဖြည်းညင်းစွာ ရှူထုတ်လိုက်ပါ။ ရှူထုတ်တဲ့အချိန်မှာလည်း ၁၂၃၄၅လို့ စိတ်ထဲကနေရေရွှတ်ပါ။ အဆုတ်ထဲ လေကုန်သွားတဲ့ အချိန်နဲ့ ၅အထိ ရေရွှတ်ပြီးတဲ့အချိန် တပြိုင်တည်းဖြစ်ရပါမယ်။

နောက်တစ်နည်းကတော့ တော်တော်များများ သိကြတဲ့နည်းပါ။ တိတ်ဆိတ်ငြိမ်သက်တဲ့ နေရာကို ရွေးပါ။ စိတ်နဲ့ ခန္ဓာကိုယ်တစ်ခုလုံးကို ဖြေလျှော့ပြီး ခါးကို မတ်မတ်ထား၍ ထိုင်ပါ။

ပြီးရင် အသက်ကို ဖြည်းညင်းစွာ ရှူသွင်း ရှူထုတ်လုပ်ပါ။ ဖြေးဖြေးနဲ့ မှန်မှန် ရှူသွင်း ရှူထုတ် လုပ်နေစဉ်အတွင်းမှာ စိတ်ကို အခြားအာရုံ မ‌ရောက်စေပဲ လေတိုးနေတဲ့ နှာသီး အဝလေးမှာ သတိကပ်ထားရမှာပါ။

နောက်နည်းလမ်းကတော့ ထိုင်ပြီး လုပ်လို့ရသလို လှဲလျောင်းပြီးလည်း လုပ်လို့ရပါတယ်။

ပထမဦးစွာ လက်ဖဝါးကို ဝမ်းဗိုက် ချက်ပေါ်မှာ တင်ထားပါ။ ပြီးရင် နှာခေါင်းကနေ လေကို ဖြည်းဖြည်းနဲ့ မှန်မှန် ဗိုက်ချပ်သွားတဲ့အထိ တဝကြီး ရှူသွင်းပါ။

ပြီးရင် ၅စက္ကန့်လောက်အထိ အောင့်ထားပါ။ ထို့နောက် ဗိုက်ဖောင်းလာတဲ့အထိ ပါးစပ်ကနေ အောင့်ထားတဲ့ လေတွေကို ဖြည်းဖြည်းနဲ့ မှန်မှန် မှုတ်ထုတ်ပါ။

အထက်ပါ အသက်ရှူလေ့ကျင့်ခန်းများကို စိုးရိမ်းပူပန်မှု လွန်ကဲနေချိန်မှာ လုပ်နိုင်သလို အားလပ်တဲ့ အချိန်များမှာလည်း အချိန်ပေးပြီး လုပ်ပေးသင့်ပါတယ်။

(၂) အကြောလျှော့ လေ့ကျင့်ခန်း

ပထမဆုံး အနေနဲ့ ဦးခေါင်းပိုင်းကို အကြောလျှော့ပါမယ်။ မျက်လုံးကို မှိတ်ထားပြီး မျက်ခုံးကို ပင့်နိုင်သမျှ ၅စက္ကန့်ကြာအောင် ပင့်ထားပါ။

ထိုသို့ လုပ်နေစဉ်အတွင်းမှာ အသက်ကို ဖြည်းဖြည်းမှန်မှန် တဝကြီး ရှူသွင်းလုပ်ဖို့ လိုအပ်ပါတယ်။

ပြီးရင် ပါးစပ်ကို ဟနိုင်သမျှဟထားပြီး ၅စက္ကန့်ကြာအောင်ထားရပါမယ်။

ထိုသို့ လုပ်နေစဉ်အတွင်းမှာ အသက်ကို ဖြည်းဖြည်းမှန်မှန် တဝကြီး ရှူသွင်းလုပ်ဖို့ လိုအပ်ပါတယ်။

လက်သီးကို ကျစ်ကျစ်ပါအောင်ဆုပ်ပြီး လက်တွေကို ဖြောင့်တန်းစွာ ရှေ့ကို ဆန့်ထုတ်လိုက်ပါ။ ထိုအနေအထားအတိုင်း လက်တွေကို ဖြည်းညင်းစွာ မြှောက်လိုက်ပါ။

လက်ကို နောက်ကို ရောက်နိုင်သမျှရောက်အောင် လှန်မြှောက်ထား၍ ၅စက္ကန့်ကြာအောင်ထားရပါမယ်။

ထိုသို့ လုပ်နေစဉ်အတွင်းမှာ အသက်ကို ဖြည်းဖြည်းမှန်မှန် တဝကြီး ရှူသွင်းလုပ်ဖို့ လိုအပ်ပါတယ်။

ခြေဖဝါးနှစ်ခုကို ထိပြီး တင်ပျဉ်ခွေ ပုံစံမျိုးထိုင်လိုက်ပါ။ ပေါင်တွင်ကြွက်သားတွေ တင်းလာတဲ့အထိ ထိုင်ပါ။

ပြီးရင် ထိုအနေအထားအတိုင်း လက်နှစ်ဖက်ကို ဆန့်ထုတ်ပြီး ရှေ့သို့ ကိုင်းနိုင်သမျှကိုင်းလိုက်ပါ။ ထိုအနေအထားအတိုင်း ၃၊၄မိနစ်အထိ နေပေးရပါမယ်။

ထိုသို့ လုပ်နေစဉ်အတွင်းမှာ အသက်ကို ဖြည်းဖြည်းမှန်မှန် တဝကြီး ရှူသွင်းလုပ်ဖို့ လိုအပ်ပါတယ်။

လူတိုင်းဟာ စိုးရိမ်ပူပန်မှုနဲ့ မကင်းနိုင်တဲ့အတွက် စိုးရိမ်ပူပန်မှုကြောင့် ကျန်းမာရေးထိခိုက်မှုတွေ မဖြစ်စေဖို့ အထက်ပါ လေ့ကျင့်ခန်းလေးတွေကို လုပ်ဖို့ မမေ့ပါနဲ့နော်။

စာဖတ်သူအားလုံး ရွှင်လန်းချမ်းမြှေ့ကြပါစေ။